Die Saison 2004/2005 der NLB-Frauen des FC Baden
Em Sommer 2004 semmer met em neue Trainer gschtartet.
Erwartigsvoll hämmer of die erschte Trainings gwartet.
Schnäll esch eus klar gsi, a was dases de Mannschaft no fehlt.
Nach dene Mankos het de Trainer d'Trainingsschwerpönkt gwählt.
Gli eschs losgange, met em erste Schpel ede Meisterschaft.
Doch oh ha lätz, was het do för ne grossi Löcke klafft!
Drü noll hämmer als Abschtiiger gäg Kirchberg verlore.
Au ede nöchschte Schpel semmer zom Siege ned gebore.
Nor grad drü mageri Pönkt händ euses Konto verziert.
Em neue Johr hämmers de welle ha, met meh Pönkt garniert
Scho em Dezämber hämmer e de Halle afo schaffe,
dass mer för d'Röckrondi gröschtet send, met allne Waffe.
Techniktraining, Usduur, Chraft ond Kondition hämmer gha.
Absolut gar nüüt het eus euses Trainerteam erla.
So veli ond herti Trainings send aber au nötig gsi,
wel e de Vorrondi semmer öberhaupt ned gsi debi.
Ond siehe da, em erste Schpel esch eus en Sieg glonge.
Ostermundigen hämmer met zwöi zo eis bezwonge.
D'Freud öber de guet Start esch aber nome vo chorzer Duur gsi,
denn es schiint, als hätti's för eus eifach ned selle sii.
Messerfolg ond Nederlage händ sech gmacht be eus breit.
So het euses Ponktkonto ned wörkli wiiter gedeiht.
Vo Onglöck, Päch aber au Onvermöge händ veli Lüüt gredt.
So oder so, es esch eifach so öber eus cho, wie's ned sett.
Ned emmer het s'Team die bescht Leischtig chönne abrüefe.
Halt ebe so, wie's bemene top Fraue Team hätt sii müesse.
Okay, emmer guet spele sowie öberzüüge cha me ned,
wie me am Bischpel vo de FC Bade Fraue sehr guet gseht.
Vier föif Sieg hättes ede Röckrondi scho meh dörfe sii.
So wär s'Team secher ned onder de letschte Drüne gsi.
Om's Hemmels Welle, es esch jetzt halt ebe eifach mol so!
Mer verspräche euch, dass mer weder wärde ufersto.
Denn s'Ziel för 2005/2006 esch de diräkti Wederufstiig.
För das mues ede nöchschte Saison greiht wärde Sieg an Sieg.
Euses Team esch no sehr jong ond cha das secher schaffe.
För das müend mer sie aber au zöcke - alli Waffe!
